Rheoli risg llifogydd lleol yn Sir Fynwy

This page is available in English, click here

Ymgynghoriad cyhoeddus ar y Strategaeth Rheoli Perygl Llifogydd Lleol ddrafft

Ynglŷn â'r ymgynghoriad hwn
Mae'r ymgynghoriad hwn yn cael ei gynnal rhwng dydd Gwener 1af Awst, 2025, tan 23.59 o'r gloch, ar ddydd Gwener 15fed Medi, 2025.

Yn ystod y cyfnod hwn, hoffem i drigolion a busnesau ddarllen y Strategaeth Rheoli Perygl Llifogydd Leol ddrafft (Strategaeth Leol) ar y dudalen hon. Mae'n nodi sut rydym yn rheoli'r risg o lifogydd* o ddŵr wyneb, dŵr daear a chyrsiau dŵr.

Yna byddem yn gwerthfawrogi eich barn a chlywed am eich profiadau trwy lenwi'r arolwg ar y dudalen hon a fydd yn helpu i lywio'r Strategaeth Leol ar sut rydym yn rheoli ffynonellau lleol o berygl llifogydd dros y chwe blynedd nesaf. Mae eich barn yn bwysig i ni a bydd yn helpu i sicrhau bod y Strategaeth Leol, a'r Cynlluniau Gweithredu ar Lifogydd ategol, yn adlewyrchu anghenion a phryderon ein cymunedau.

Cefndir yr ymgynghoriad hwn

Cyhoeddwyd Strategaeth Rheoli Risg Llifogydd Lleol gyntaf Cyngor Sir Fynwy (CSF) (Strategaeth Leol) yn 2013, gan nodi ein dull cyffredinol o reoli risg llifogydd lleol. Ochr yn ochr â'n Strategaeth Leol, cyhoeddodd CSF Gynllun Rheoli Risg Llifogydd yn 2016, a ddatblygodd yr amcanion a'r mesurau lefel uchel a amlinellwyd yn ein Strategaeth Rheoli Risg Llifogydd Leol yn gynllun mwy manwl ar gyfer rheoli llifogydd yn ein cymunedau.

Ers cyhoeddi'r dogfennau allweddol hyn, bu diweddariad i Strategaeth Llywodraeth Cymru ar gyfer Rheoli Risg Llifogydd ac Erydiad Arfordirol yng Nghymru (Dolen Allanol). Mae deddfwriaeth newydd wedi'i gweithredu, ac mae sawl achosion o llifogydd sylweddol wedi digwydd, gan ddyfnhau ein dealltwriaeth o risg llifogydd lleol. O ganlyniad, mae CSF wedi llunio Strategaeth Leol ddiwygiedig ddrafft sy'n nodi ein cynigion ar gyfer rheoli ffynonellau lleol o risg llifogydd (dŵr wyneb, dŵr daear a chyrsiau dŵr cyffredin) dros y 6 blynedd nesaf.

Pam ydyn ni'n ymgynghori?

O dan Ddeddf Rheoli Llifogydd a Dŵr 2010, Cyngor Sir Fynwy yw'r Awdurdod Llifogydd Lleol Arweiniol ar gyfer ei ardal weinyddol. O dan y ddeddfwriaeth hon, mae'n ofynnol i Gyngor Sir Fynwy "ddatblygu, cynnal, cymhwyso a monitro" Strategaeth Leol sy'n cyd-fynd â'r Strategaeth Genedlaethol.

Dweud eich dweud am reoli perygl llifogydd

Cymerwch olwg ar y Strategaeth Leol ddiwygiedig ddrafft ar y dudalen hon, ac yna rhannwch eich adborth drwy'r arolwg ar y dudalen hon.

Os yw'n well gennych, gallwch gael copi papur o'r arolwg a'r wybodaeth ategol yn eich Hyb Cymunedol agosaf. Dylid dychwelyd y copi papur i’r Hyb erbyn dydd Gwener 15fed Medi fan bellaf.

Rydym hefyd yn cynnal sesiynau galw heibio wyneb yn wyneb yn y lleoliadau canlynol ar y dyddiadau a restrir isod. Mae croeso i chi alw heibio i drafod ein Strategaeth Leol ddiwygiedig ddrafft a gofyn unrhyw gwestiynau sydd gennych.

Dydd Mercher 20fed Awst, 9am – 5pm yn Hyb Cymunedol y Fenni, Neuadd y Dref, Stryd y Groes, Y Fenni, NP7 5EU

Dydd Llun 25ain Awst, 9am – 5pm yn Hyb Cymunedol Brynbuga, 35 Stryd Maryport, Brynbuga, NP15 1AE

Dydd Mawrth 26ain Awst, 9am – 5pm yn Hyb Cymunedol Trefynwy, Neuadd Rolls, Stryd Whitecross, Trefynwy NP25 3BY

Dydd Iau 11eg Medi, 9am – 5pm yn Hyb Cymunedol Cil-y-coed, Ffordd Woodstock, Cil-y-coed, NP26 5DB

Cysylltwch â ni yn flooding@monmouthshire.gov.uk os oes gennych unrhyw sylwadau neu gwestiynau.

Beth sy’n digwydd nesaf?

Yn dilyn y cyfnod ymgynghori hwn, byddwn yn ystyried yr ymatebion ac yn diwygio'r Strategaeth Leol ddiwygiedig ddrafft lle bo'n briodol, er mwyn sicrhau ei bod yn adlewyrchu anghenion a phryderon cymunedau Sir Fynwy.

Bydd y Strategaeth Leol derfynol, a'r asesiadau amgylcheddol cysylltiedig, yn cael eu cyflwyno i Gabinet Cyngor Sir Fynwy i'w cymeradwyo cyn cyflwyno'r dogfennau terfynol i Lywodraeth Cymru i'w cymeradwyo gan Weinidogion.

Cyhoeddir diweddariad ar Gadewch i Ni Sgwrsio am Sir Fynwy ar ôl i'r broses gael ei chwblhau. Mae'n debygol y bydd hyn ddiwedd 2025/dechrau 2026. Cofrestrwch ar gyfer Gadewch i Ni Sgwrsio am Sir Fynwy i sicrhau eich bod yn gallu dilyn cynnydd yr ymgynghoriad hwn.