This page is available in English here(Dolen allanol)

DIWEDDARIAD 22/05/2025

Mae Cyngor Sir Fynwy yn falch o gyhoeddi bod y Weinyddiaeth Amddiffyn (MOD) wedi darparu diweddariad ynghylch ailagor Pont Inglis, Trefynwy.

Yn dilyn y cyhoeddiad diweddar am gyllid wedi’i sicrhau, mae’r gwaith yn mynd rhagddo, gyda disgwyl i gontractwyr gael eu penodi yn ystod haf 2025. Disgwylir i’r cyfnod adeiladu barhau am gyfnod o 12 wythnos, gyda disgwyl i’r gwaith gael ei gwblhau erbyn diwedd y flwyddyn galendr, yn amodol ar benodi contractwyr llwyddiannus a chaniatâd amgylcheddol.

Mae Cyngor Sir Fynwy yn croesawu’r newyddion bod y Weinyddiaeth Amddiffyn wedi sicrhau cyllid ar gyfer y gwaith hanfodol sydd ei angen i ailagor Pont Inglis a’r diweddariad diweddaraf hwn. Bydd Cyngor Sir Fynwy yn parhau i ymgysylltu â’r Weinyddiaeth Amddiffyn, Cymdeithas y Lluoedd Wrth Gefn a’r Cadetiaid a rhanddeiliaid allweddol ehangach i sicrhau cynnydd cynaliadwy.

Dwedodd Cyng. Sara Burch – Aelod Cabinet dros Faterion Gwledig, Tai a Thwristiaeth Cyngor Sir Fynwy, “Mae Pont Inglis, sy’n eiddo i’r Weinyddiaeth Amddiffyn, yn gyswllt hanfodol i gerddwyr ar gyfer cymuned Trefynwy, ac rydym yn diolch i drigolion am eu hamynedd a’u cefnogaeth barhaus.”

Dywedodd llefarydd ar ran Cymdeithas y Lluoedd Wrth Gefn a’r Cadetiaid Cymru, sy’n cynnal y bont ar ran y Weinyddiaeth Amddiffyn, “Hoffem sicrhau’r gymuned leol ein bod yn gweithio mor gyflym â phosibl i adfer mynediad diogel ar draws y bont.”

DIWEDDARIAD 25/3/25

Cyngor Sir Fynwy yn croesawu cyllid ar gyfer Pont Inglis

Mae Cyngor Sir Fynwy yn croesawu’r newyddion bod y Weinyddiaeth Amddiffyn wedi sicrhau cyllid ar gyfer y gwaith hanfodol sydd ei angen i ailagor Pont Inglis.

Mae Pont Inglis, sy’n eiddo i’r Weinyddiaeth Amddiffyn, yn gyswllt hanfodol i gerddwyr i gymuned Trefynwy.

Dywedodd y Cynghorydd Mary Ann Brocklesby, Arweinydd Cyngor Sir Fynwy: “Rwyf wrth fy modd bod yr arian wedi’i ganfod i adnewyddu Pont Inglis. Dylai cymuned Trefynwy deimlo’n haeddiannol falch bod eu dyfalbarhad wrth fynnu ailagor yn gyflym wedi’i fodloni’n llawn. Rydym i gyd yn edrych ymlaen at groesi’r bont yn ddiogel unwaith eto.”

Bydd Cyngor Sir Fynwy yn parhau i ymgysylltu â’r Weinyddiaeth Amddiffyn a Chymdeithas y Lluoedd Wrth Gefn a’r Cadetiaid.

DARLLENWCH Y DATGANIAD I'R WASG YN LLAWN YMA(Dolen allanol)

Am y dudalen hon

Mae'r dudalen hon wedi'i chreu i ddarparu llwyfan lle gellir cofnodi barn trigolion a'i defnyddio fel tystiolaeth i lobïo ymhellach am benderfyniad i gau Llwybr Troed 131 Trefynwy, sy'n ofynnol o ganlyniad i faterion diogelwch ar Bont Inglis.

Mae hwn hefyd yn ofod i roi gwybod i chi am y cynnydd sy’n cael ei wneud tuag at atgyweirio neu amnewid Pont Inglis.

Mae'r bont, sy'n eiddo i'r Weinyddiaeth Amddiffyn (MoD), yn ffurfio cyswllt pwysig i gerddwyr o fewn cymuned Trefynwy. Rydym yn gwerthfawrogi’r effaith y mae cau’r llwybr hwn, a ddechreuodd ym mis Medi 2024, wedi’i chael ar fywydau preswylwyr.

Sut gallwch chi helpu

Hoffem ofyn am eich help i ddangos effaith cau’r llwybr troed ar draws Pont Inglis i chi drwy lenwi’r ffurflen fer isod.

Gallwch wneud hyn drwy rannu'r effaith y mae'r cau wedi'i chael arnoch chi gyda ni trwy ffurflen fer ar y dudalen hon.

Cysylltwch â ni os gwelwch yn dda i ddweud wrthym pa mor bwysig yw'r llwybr hwn i chi. Os ticiwch yr opsiwn “Rwy’n cydsynio” ar y cwestiwn olaf, efallai y bydd eich barn yn cael ei rhannu (yn ddienw) gyda’r Weinyddiaeth Amddiffyn a/neu Lywodraeth Cymru mewn trafodaethau am y bont yn y dyfodol.

Rydym yn gwerthfawrogi unrhyw amser y gallwch chi ei sbario i rannu eich profiadau gyda ni. Diolch.

Cyhoeddwyd y diweddariad diwethaf ar 20fed Mawrth, 2025.(Dolen allanol)

Estyniad dros dro i gau Pont Inglis wrth i CSG a'r Weinyddiaeth Amddiffyn barhau â'r trafodaethau

Mae Cyngor Sir Fynwy yn parhau i ymgysylltu’n frwd â’r Weinyddiaeth Amddiffyn (MOD) ynghylch y gwaith angenrheidiol i ailagor Pont Inglis yn Nhrefynwy.

Mae trafodaethau wedi bod yn mynd rhagddynt ar y lefel uchaf i ddatrys y sefyllfa hon.

Fodd bynnag, mae Pont Inglis yn parhau i fod ar gau i gerddwyr yn dilyn arolwg a gynhaliwyd gan y Weinyddiaeth Amddiffyn, a ddangosodd nad yw'r bont yn ddiogel ar gyfer mynediad cyhoeddus.

Mae’r Gorchymyn Cau Dros Dro presennol i fod i ddod i ben ar 3ydd Ebrill 2025.

Gan na ddaethpwyd i unrhyw benderfyniad gyda'r Weinyddiaeth Amddiffyn, mae estyniad pellach o chwe mis yn cael ei geisio ar hyn o bryd hyd nes y bydd y Weinyddiaeth Amddiffyn wedi cwblhau'r gwaith angenrheidiol i wneud y bont yn ddiogel i'r cyhoedd ei defnyddio.

Mae Cyngor Sir Fynwy wedi ymgysylltu’n gyson â’r Weinyddiaeth Amddiffyn ynghylch yr ailagor ac mae’n annog y sefydliad yn gryf i ddod o hyd i ateb.

Cysylltodd Arweinydd y Cyngor, y Cynghorydd Mary Ann Brocklesby, â'r Weinyddiaeth Amddiffyn eto i fynegi siom enbyd y cyngor gyda'r diffyg cynnydd o ran adfer pont Inglis. Nid yw'r cyngor wedi derbyn unrhyw gadarnhad o hyd ynglŷn ag amserlen ar gyfer dechrau'r gwaith.

Dywedodd y Cynghorydd Mary Ann Brocklesby, Arweinydd y Cyngor: “Mae’r cyngor yn cydnabod pryderon haeddiannol y trigolion ac effeithiau cau’r bont ar bawb yn ein cymuned yn Nhrefynwy. Rydym yn parhau i bwyso ar y Weinyddiaeth Amddiffyn am eglurder ynghylch y gwaith sydd ei angen a dyddiad ar gyfer ailagor pont Inglis.

"Rydym yn rhannu'r rhwystredigaeth a'r anghyfleustra y mae'r cau hwn wedi'i achosi. Rydym yn parhau'n ymrwymedig i roi'r wybodaeth ddiweddaraf i'r cyhoedd yn rheolaidd am gynnydd y trafodaethau ac unrhyw ddatblygiadau."

Dywedodd y Cynghorydd Sara Burch, Aelod Cabinet Cyngor Sir Fynwy dros Faterion Gwledig, Tai a Thwristiaeth: “Mae Pont Inglis yn gyswllt hanfodol i’r gymuned gael mynediad i fannau gwyrdd ac amwynderau lleol.

“Ceisio estyniad ar gyfer y cau yw’r peth olaf yr ydym am ei wneud, ond oherwydd diffyg diweddariadau neu gynnydd gan y Weinyddiaeth Amddiffyn, rydym yn ceisio sicrhau diogelwch pawb.”