Llwybrau – Llwybrau wedi'u mapio, a llwybrau sydd ar goll o'r map

Mae 'Llwybr Presennol' ar y MRhTLl yn un sydd wedi'i archwilio'n bersonol ac wedi cyflawni sgôr o 70% neu uwch, sy'n golygu ei fod yn bodloni 'safonau Teithio Llesol' yn ôl y Canllawiau Teithio Llesol a'i offeryn archwilio. Mae 'llwybrau sy’n bodoli ' eisoes yn bodloni safonau teithio llesol Llywodraeth Cymru, sy'n golygu y gellir eu defnyddio'n barod ar gyfer teithiau bob dydd.

Mae 'Llwybr y Dyfodol' ar y MRhTLl yn llwybr nad yw wedi'i greu eto, neu mae’n un sydd angen ei wella i lwyddo mewn archwiliad Teithio Llesol. Mae'r llwybrau hyn yn rhai y mae Sir Fynwy yn cydnabod bod angen eu creu neu eu gwella er mwyn cyrraedd y safon.

Os ydych chi'n meddwl bod llwybr ar goll, rhowch bin ar y map yn y lleoliad cywir, rhowch yr union leoliadau a disgrifiad manwl o'r llwybr fel y gall y tîm Teithio Llesol ymchwilio iddo ac addasu'r map rhwydwaith os oes angen. 

Gair i’ch atgoffa, bod yn rhaid i unrhyw lwybrau a awgrymir fod yn rhai sy’n cael eu defnyddio at ddibenion Teithio Llesol ac nid am resymau hamdden yn unig.

Mae llwybr Teithio Llesol safonol yn un sy'n bodloni'r gofynion safonol a osodir gan Ganllawiau’r Ddeddf Teithio Llesol. Gellir plotio llwybrau ar y MRhTLl fel rhai 'Presennol' pan fyddant yn cael sgôr o 70% yn dilyn archwiliad personol, gan ddefnyddio'r offeryn archwilio Teithio Llesol yng Nghanllawiau'r Ddeddf Teithio Llesol.

Nod yr archwiliad yw sicrhau dull cyson o asesu llwybrau teithio llesol ledled Cymru. Mae'r archwiliad yn ystyried dangosyddion sy'n cyfrannu at bum egwyddor allweddol llwybr teithio llesol (cysur, diogelwch, pa mor uniongyrchol yw’r llwybr, a pha mor gydlynol ac atyniadol ydyw). Mae dau bwrpas i’r archwiliad: 

• Asesu llwybr arfaethedig. 

• Asesu dyluniad llwybr fel rhan o broses ddylunio llwybr. 

Mae'r archwiliad cerdded ac olwynio yn cael ei farcio allan o 20 dangosydd, a’r elfen feicio allan o 25 dangosydd. Mae pob dangosydd yn cael sgôr o uchafswm o 2 bwynt. Mae hyd at 40 pwynt ar gael ar gyfer llwybrau cerdded ac olwynio, a 50 pwynt ar gael ar gyfer llwybr beicio. Mae'r sgoriau hyn yn cael eu trosi i ganrannau i ganfod a yw llwybr yn 'llwyddo' neu’n 'methu'.